STORIE VAN HOOP!

Die opskrif van die berig in Die Burger het alreeds aandag getrek: Van plakkerskamp tot 'n Matie.

Ná ’n Forum-artikel in Die Burger verlede Saterdag deur dr Mi­chael le Cordeur, die Universiteit Stellenbosch (US) se BEd-programbestuurder, oor Yanga Mcunukelwa (21) wat 5 onderskeidings in matriek gekry het (gemiddelde A) was daar groot reaksie.  Mcunukelwa het die prestige-Thuthuka-beurs van Saica (die Suid-Afrikaanse Instituut vir Geoktrooieerde Rekenmeesters) ontvang. Verskeie dosente en talle anonieme donateurs is geraak deur Mcunukelwa se aanhouer-wen-houding.

'n Beskeie Mcunukelwa het betekenisvol reageer met: “Al die aandag is oorweldigend. Dit sit baie druk op my. Maar daar’s nóg Yangas daarbuite. Hulle moet weet: Droom jou droom – dit kan waar word deur harde werk.”

Lees gerus hierdie merkwaardige verhaal van welwillendheid en hoop by http://www.dieburger.com/Suid-Afrika/Nuus/Van-plakkerskamp-tot-n-Matie-20120126

BEMOEDIGENDE TEKENS

Al drie Afrikaanse koerante het teen die einde van die week hieroor groot berig, naamlik die totstandkoming van Corruption Watch (CW),’n nie-winsgewende organisasie wat deur Cosatu in die lewe geroep is om korrupsie aan die kaak te stel. 

By die geleentheid van die bekendstelling van CW, het die minister van justisie oa gesê:  “Enige wet wat mediavryheid in gevaar stel, sal verkeerd wees...Die media speel ’n baie belangrike rol in die stryd teen korrupsie... Persvryheid stel die media in staat om korrupsie oop te vlek. Ons het dikwels nie genoeg waardering vir die waghondrol wat die media speel nie... Ons wil hê die media moet voortgaan met sy onvermoeide pogings om korrupsie te ontbloot.”

Radebe het gesê dit sal nie in dié stadium vir hom van pas wees om hom oor die Wetsontwerp op die Beskerming van Inligting uit te laat nie, maar hy steun mediavryheid heelhartig.

Om die minste te sê 'n bemoedigende gebeurtenis en woorde van hoop.